Kurd, Destpêka Dîroka Etnîkî ya Gelê Kurd

Etnografyaya Kurd ev serê sedsalekê ye bûye warekî dînamîk, ku gelek zanyarên bîyanî û Kurd ên mîna Diakonoffê pisporê dîroka Medyayê, Minorskyê zanayê dîroka Kurdistanê, Bazil Nikitine, M. Emîn Zekî, Qanatê Kurdo, Turayev, Pêkolêvsky, Petrovisky, Partt û Marr gelek xebat kirine. Nivîskarê vê pirtûka bi navê Kurd, Destpêka Dîroka Etnîkî ya Gelê Kurd, O. L. Vilcheviskjyê rojhilatnas, dîroknas û etnografê bi nav û deng ê Sovyeta berê jî yek ji wan akademîsyenan e. Vilcheviskjyê ku bi Kurdî gelekî baş zanîbûye, di salên Şerê Cîhanê yê Duduyan de, di dema Komara Kurd a Mahabadê de, li navçeyên Kurdnişîn ên Îranê maye, wê hingê her çend hin raporên nehênî yên negatîv li ser tevgerên Kurdan ji Yekîtîya Sovyetan re nivîsîbe jî, berî wê û piştî wê, wî bi dehan lêkolîn, pirtûk û bendên hêja li ser Kurdan nivîsîne, lewma jî girîng e di warê etnografyaya Kurd de wekî yek ji girîngtirîn kesan bê zanîn û xwendin.

O. L. Vilcheviskj di Kurd, Destpêka Dîroka Etnîkî ya Gelê Kurd ya akademîk de xwe dispêre gelek zanyarên navdar, ji dil û can hewil dide hinek xalên di etnografyaya Kurd de ronî bike, yên wekî jîyana aborî û civakî ya rûniştevanên berê yên welatê Kurdan, jîyana koçerîyê, rêyên di hilgêrbûn û dagêrbûna wan a ji zozanan de, rola sewalvanîyê, rola kişt û kalê û dîroka eşîrên cihêreng ên Kurd.