Serek

Şew a, şewa tarî û zulmat a. Çim çimî nêvîneno. Herd û asmên zê domanê sêwî jîbeno, bermeno. Kam çi zano belkî herd û asmên çin o, belkî qet teba çin o.
Asmên orte de bî di leteyî. Çîyê vecîya orte. Ne est bî ne çin bî. Qet nêmendîbî tebayî. Ya kî teba nêmendîbî ey; çîyo ke serê herdî de, qet yew nêmendîbî ey. Ya kî o nêmendîbî tebayî. O çîyo ke serê herdî de, o bî feqet qet yewî hurenda ey nêgirotêne. O pêro bî; çi ke serê herdî de est bî, pêro o bî. Ne rîyê xo est bî ne şeklê xo. O goşt ra, gonî ra nêbî. O candar nêbî la bêcan kî nêbî. Ne germin bî ne serdin, ne derg bî ne kilm, ne zaf bî ne şenik, ne tern bî ne huşk, ne kokim bî ne genc, ne gilorkin bî ne duz, ne fetelîyêne ne hurenda xo de vindetêne. Yê ey, zê qulê di-lingî destê xo, lingê xo, sereyê xo, çimê xo, goşê xo, qelbê xo çin bî. Nêmendîbî qulê di lingî.